أنا تفاصيل كتير

أنا تفاصيل كتير 

تفاصيل بتعمل حياة محدش عاشها غيري .....

ومش ناوية أخسرها 

بحب أعيش أضحك أهزر أجري أنكش شعري وأتنطط ،أغني وأرقص ،أكبر وأصغر .... بحب أكون نفسي بس ،ولما أتوه من نفسي أحب أقعد افتكرني ،أقعد لوحدي أمشي لوحدي أفكر لوحدي ....

لما أفكر بعرف قد ايه بحبني وبحبك .... بحب الدنيا وبحب تفاصيلي وتفاصيلك 

قد ايه التفاصيل دي اللي ممكن تكون شايفها صغيرة ومش مهمة ،بتعملني وبتسعدني 

أحب أقعد لوحدي أبص للنور اللي جاي من الناحية الثانية في البحر أسرح فيه وأحس قد ايه انا صغير والكون كبير أوي وبعيج ومليان ناس، وقد ايه أنا لازم أسعدني وأمسك فيا أوي علشان متوهش 

أحب أشرب حاجة سخنة وأنا قاعدة لوحدي على البحر، والأهم اني امسكها وأحس بالبخار على ايدي يلسعني علشان أحس اني موجودة وان كل حاجة بتبرد وبتهد|أ وتعدي ،وان السعادة مش محتاجة غير اني امسك في التفاصيل الصغيرة دي اللي بتسعدني

أحب أقرأ رواية وأغوص في تفاصيلها وأبطالها يا أحلى حدوتة في حياتي 

أحب أضحك في الشارع لما أفتكر حاجة حلوة وأكشر لما أتخيل اني بعاتب حد يهمني 

أحب العب مع الاطفال في الشارع حتى لو الناس شايفة ان ده غباء 

أحب أشرب ليبتون شاي أخضر علشان أقرا اللي مكتوب على الورقة بتاعته

أحب أشرب ماية وأنا متضايقة وأحس بيها بتنزل جوايا وتشيل كل المشاكل مكانها 

مش بحب أقرأ شعر علشان مش بعرف أقرأ المشاعر بعرف أحسها 

مش بحب أدب المسرح لاني مبحبش حد يجبرني على اني أتخيل أو أفكر أو حتى أشوف أي تفاصيل 

عمري ما حسألك اسمك وشغلك وسنك وعنوانك ولا حتى ديانتك ، حسألك بس عن تفاصيلك ..... حبني زي ما أنا أو اتركني في هدوء

تعرف تحبني زي ما أنا ......

تكملني مش تغيرني ....

تكون عمري اللي مستنيك علشان يبدأ

تكون حدوتي اللي مش مجرد خيال

Hager . 3-5-2014

بكره الوعود

ليه متفكرش مرتين قبل ما توعد

ليه متسألش نفسك اللي قدامك حيفهم ايه 

ليه متحطش نفسك مكانه ومتسمحش لنفسك تكسر حلم انت اللي حطيته جواه

ليه بكلمة صغيره تخلي انسان ربنا اداله حق انه يحلم يكره حقه حتى في الحياة

ليه متخيل ان كلمة متخافش سهلة ؟؟

ليه متعرفش انك بيها بتشيل مسئولية قدام الانسان اللي قولتهاله ليه ؟؟ 

بس ليه ؟؟؟

طيب هو انت محدش خلف معاك وعد قبل كدة ؟؟؟؟ محدش خان ثقتك ؟؟؟؟

ليه متبقاش ((راجل)) قد كلمتك ولو تقدر على حاجة تقولها متقدرش متنسحبش من لسان ((......)) ...... 

زعلان شايفها شتيمة ؟؟!!!! 

اه على فكرة شتيمة بس انا اللي اسمي بنت قدها وعارفة انا بقول ايه ...... ........... ................. 

كان عندنا معيد (مدرس مساعد يعني) في مرة كان بيتكلم عموما وقال جملة استغربتها وايامها قولت الراجل ده 

مجنون (أنا اسفة) بس الحقيقة

انه راجل بس 

عارف هو بيقول ايه ؟؟

كان يومها بيقول لما واحد يقولك اوعدك اني حفضل احبك طول العمر وحفضل معاكي للابد قوليله انت كداب !! 

لان مفيش حد عارف بكرة حيحصل ايه ولا حيحس بايه .....

عارفين اكرملك تقوليلي احنا صحاب النهاردة وانا اوافق او ارفض ......

 احسن ما تقوليلي احنا صحاب على طول .............

تصدقوني لو قولتلكم ان عمر ما حد وعدني بحاجة ونفذ وعده

هو مش من حقي بوعد حتى لو صغير يتنفذ

مش من حقي بالامان من ان اللي قدامي ده وعدني

انا بقيت بكره الكلام 

بكره الحروف 

بكره الوعود 

بكره أي حاجة بتفكرني بإن مفيش حد قد كلامه

فيه غلطات مينفعش فيها عتاب

كتير جدا شايفين اني مالش قرار وان شخصيتي ضعيفة 

ويمكن ده اللي بيخلوهم بيشوفوني مجنونة 

وبيشوفوا ردود أفعالي قوية على الحدث 

قبل ما تستغرب من حاجة عملتها معاك فكر لمدة 5 دقايق بس ايه اخر تصرفاتك معايا وكام مرة عملت معايا حاجات متقبلش حد يعملها معاك وعديتهالك

كام مرة لمحتلك ان الصحاب ميعملوش كدة 

كام مرة قابلت كلامك اللي يحرق الدم بضحكة وقلبته هزار 

ساعتها بس حتفهم ان رد فعلي مش قوي ولا حاجة واني صبرت كتير وكت شارية 

العتاب مش سهل انا مش حقولك خنتني ليه وهنت عليك ليه 

مش حقولك ليه محبتنيش وخفتي عليا زي ما بحبك وبخاف عليكي 

اللي يمكن بيقوي موقفكم انكم مش فاهمين رد فعلي 

اني برفض العتاب او الكلام واني بعمل محكمة وبعلن الحكم وبرفض الاستئناف 

ساعتها اللي بيعرف اني بعرف اخد قرار واني مش ضعيفة بيبقى خرج من حياتي للابد 

واللي بيخلي باقي الناس تستغرب اكتر اني مش بتكسف ولا بخبي اني لسه بحبهم بس اللي ميعرفوهوش ان اللي اتحكم عليه خلاص مبقاش من حقه يعرف مكانته عندي وان حبي ليهم وانهم بيوحشوني ده ليا مش ليهم , علشان انا اللي بعيش علشان بحبهم مش علشان هما يستاهلوا الحب ده 

فيه غلطات مينفعش فيها عتاب أنا آسفة بس أنا مقتنعة 

يناير 2014

هاجر وهبة

لم أذقه بعد

يملؤني حنين لدفء حضن لم أذقه بعد ........ 

Hager . 23.01.2014

The End

اكيد كلنا عدت علينا اللحظه دي

عشناها 

وخفنا منها 

مع اننا مش عارفين ليه

...............................................

لما بنبقى مبسوطين اوي وحاسين بسعاده مش عارفين اذا كان فعلا الزمن ضحك لنا للدرجه دي 

ممكن نبقى مش حاسين قد ايه هي لحظة مميزة 

بس بنبقى عارفين اننا مبسوطين

ومش عارفين خايفين ليه

لما بنبقى بنودعه وحاسين انه مش حيكون موجود تاني

لما بنبقى لازم نمشي بس خايفين نتحرك من مكانا

لما بتبقى كل خطوة بتاخد من ضحكتنا 

الضحكه اللي كانت ماليه وشنا قبليها بثانيه

...............................................

لما بنبقى عايشين حاله من الامان ... الحب ... الصداقة

حاله مش عارفين غير انها تكفينا وتحمينا من كل الدنيا 

لما بتبقى بعد كل خطوة بتبص وراك تاني 

على امل انك نسيت حاجه 

او ان فيه حاجه حتطمنك وتقولك ان دي مش اخر مرة 

...........................................

لما بتبقى بتودع صديق انت عارف انه خلاص مش حيبقى فاضي لك تاني 

لما تبقى بتحضن قريب وانت خايف ان متلاقيش الحضن ده تاني 

لما تبقى بتودع  عيون حاسس انها حتخون

لما تبقى بتنهي فسحة متاكد انها مش حتحصل تاني 

....................................

ممكن تنسى كل حاجه في حياتك بس عمرك ما حتنسى اخر لحظة 

اخر سلام

اخر نظرة 

لانك حتستنى كتير بعدها انك تكون غلطان 

حتفضل تفتكرها وتعيشها في كل مرة تحتاج لصديق او اخ او قريب او حتى حبيب

لانها لحظه عدت عليك طويله وانت عارف ان كل خطوة معناها ...

انك بتطلع من الصورة وبتدخل مكانك كلمة واحد بس THE END.

Hager . 12-4-2011

مين عارف الخير فين

كتير حصلت لنا حاجات وحشة 

وكتير استنينا حاجات ومحصلتش

وكتير حلمنا واتمنينا حاجات .... ولما محصلتش فكرنا حياتنا  وقفت

لكن لو فكرنا حنلاقيها عادي شغاله

مش كده وبس .... احنا كمان كتير ضحكنا وفرحنا وخرجنا بعدها

احلى حاجات بتحصلنا اللي ربنا يبعتهالنا من عنده

اللي احنا مكناش نعرف مكانها ولا عمرنا دورنا عليها

.........................

احلى 10 شهور في حياتي قضتها في منحة MCIT في YAT

10 شهور قضتهم مع احلى اخوات

شباب وطبعا البنات "احلى حاجه في الدنيا " 

اتعلمنا واتصاحبنا وفهمنا بعض ووقفنا جنب بعض

وحشتوني وبحبكم كلكم 

طبعا عارفه ان عمرها ما حترجع تاني 

بس حفضل طول عمري احمد ربنا اني عرفتكم 

.....................

فيه ناس قابلتهم في اماكن ضايقتني وجرحتني وصدمتني 

بس هما فرقوا في حياتي كتير 

مكنتش متخيله اننا حنبقى صحاب

لكن عدت سنين واكتشفت اننا صحاب من 3 سنين 

ويارب نفضل صحاب على طول

.......................

الاحلى من كل ده ☺☺

....................

ان ربنا بيدينا مع كل صدمة وشدة الحاجه اللي حتطلعنا منها 

حتى لو كنا مش حاسين 

فكروا..... حتلاقوا نفسكوا بتقولوا  الحمد لله وان ربنا رحيم بينا اكتر حتى من اهلنا 

وبيحبنا  اكتر من نفسنا

الحمد لله على كل شئ .... اللهم اغفر لنا وارحمنا واعف عنا

.................

انا اعرف واحده كانت السبب فان ايام صعبه اوي تعدي عليا 

واني ارجع تاني اضحك واعيش

مع انها مكانتش تعرف

متعرفش حتى انا زعلانه ليه ومن ايه 

علمتني ان اتبسط وافرح باللي انا فيه 

لدرجة اني حسيت ان مفيش حاجه تستاهل اني اتضايق

كل ده وهي متعرفش

.............

مش شرط  علشان اكون صاحبتك اني اعرف كل حاجه

المهم اني اقدر اسعدك واقويكي لما الدنيا تحبكها معاكي شويتين

.............

شكرا ليكي يا الاء 

بحبك اكتر مما تتخيلي

 ♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

لانك علمتيني كتييييييييييييييييييير 

سيدة تتحدى القطار

عندما كنت صغيرة قالت لي مدرستي الحبيبه -" ميس صباح " طبعا لو متعرفوهاش-لا تعطي متسول يستطيع ان يعمل واليوم تاكدت ان احيانا المتسول يعمل .؟!؟

هل تعلمون القطار يلتهم كم فرد سنويا ؟

لن اكذب عليكم لا اعلم ايضا ولا املك الشجاعه لاعلم

ولكن رأيت اليوم سيدة تجلس امام القطار وتتحداه ...........نعم هذا صحيح

يوميا تقريبا اعبر من ذلك المكان اراها تجلس لا تطلب -حسنه- كما يفعل الاخرون بل تجلس ثابته النظر على هذا الشريط اللعين الذي يلتهم ما يلتهم من الشباب والاطفال لايشعر بالرحمه واذا رات القطار ........................... تصرخ .......................نعم تصرخ في اوجه المارة "فيه قطر،،، فيه قطر" واذا لم ينتبهوا واذا قرروا ان يضربوا بتحذيراتها عرض الحائط فانها تجذبهم من اذرعهم وتوقفهم .

انها تعمل وتستحق مرتب ثابت لقد قامت بوظيفه لم تعيرها حكومتنا الموقرة ادنى اهتمام "تحذرنا من الموت او العجز ".!؟

لذلك انها تستحق ما تكسبه يا مدرستي العزيزة وايضا ان ندعوا لها بالجنة

هنيئا لك الجنة يا فاضله